Tokyo မှ Dr. SEJI OHAWA နှင့် Dr.ATSUMO SHIMODU ပါဝင်သောအဖွဲ့မှာ
မြိတ်ကျွန်းစု အတွင်းရှိ ဒုံးညောင်မှိုင်း၊ ဒုံးပုလဲအော်၊ ပလောဝမ်း
စသည့်ကျေးရွာများမှ ဆလုံ လူမျိုးများကို ဒီဇင်ဘာ ၂၃ ရက်မှ ၂၉ ရက်အထိ သုတေသန
ပြုလုပ်ခဲ့ခြင်းဖြစ်သည်။“ဆလုံလူမျိုးတွေ အများဆုံးရှိတဲ့ အဲဒီသုံးရွာမှာ သုတေသနပြုလုပ်တာ ဖြစ်ပါတယ်။ တခြားရွာတွေလည်း သွားရောက်လေ့လာမှုတွေ ပြုလုပ်ခဲ့ပါတယ်။ အဓိက ရည်ရွယ်ချက်ကတော့ ဆလုံလူမျိုးတွေရဲ့ ကျန်းမာရေး အနေအထားတွေ၊ ပညာရေးနှင့် ဥာဏ်ရည် အနေအထားတွေ သုတေသနပြုလုပ်တာ ဖြစ် ပါတယ်။ ဆလုံလူငယ် ၄၀၀ ကျော်လောက်ကို စမ်းသပ်ခဲ့တာ ဖြစ်ပါတယ်” ဟု သုတေသနအဖွဲ့နှင့် လိုက်ပါဆောင်ရွက်ပေး ခဲ့သူ ဆလုံလူမျိုးများ ဖွံ့ဖြိုးတိုးတက်ရေး ဥက္ကဋ္ဌ တိုင်းဒေသကြီးဝန်ကြီး ဦးတင်စိုးက ပြောကြားခဲ့သည်။
ကျွန်းစုမြို့နယ် အတွင်းရှိ ဒုံးညောင်းမှိုင်ရွာတွင် ၆၈ ဦး၊ ဒုံးပုလဲအော်ရွာတွင် ၂၇၂ ဦး၊ ပလောဝမ်းကျေးရွာတွင် ၇၀ တို့ကို သုတေသန ပြုလုပ်ခဲ့ကြောင်း သိရသည်။ “ဆလုံလူမျိုးတွေကို ဒီလိုလေ့လာ ခဲ့ရာမှာ တွေ့ရှိချက်တွေ ကတော့ ဥာဏ်ရည် ဥာဏ်သွေးပိုင်းတွေက တခြားလူမျိုးတွေနဲ့ အတူတူပါပဲ။ ကုန်းပေါ်က လုပ်ဆောင်ချက်တွေမှာလည်း တန်းတူ လုပ်နိုင် ပါတယ်။ ရေထဲမှာ လုပ်ဆောင်ချက်တွေကတော့ သူတို့က ရေပျော်တွေ ဖြစ်တဲ့ အတွက် အများကြီး သာပါတယ်။ ဂျပန်တက္ကသိုလ် ကတော့ သူတို့တွေ့ရှိချက် ရလဒ်တွေကို တိုင်းဒေသကြီး အစိုးရကို ပြန်လည်ပေးပို့ သွားမှာဖြစ်ပြီး သူတို့ရဲ့ လိုအပ်ချက်တွေကို အတတ်နိုင်ဆုံး ဖြည့်ဆည်းဆောင်ရွက် ပေးသွားမှာပါ” ဟု တိုင်းဒေသကြီးဝန်ကြီး ဦးတင်စိုးက ပြောကြား ခဲ့သည်။
ဆလုံ တိုင်းရင်းသားများမှာ ပညာရေးပိုင်းတွင် အားနည်းမှုနှင့် ရိုးသားကြောက်ရွံ့မှုများကြောင့် စီးပွားရေးသမား တချို့၏ အမြတ်ထုတ်မှု ခံနေရပြီး ပညာရေးပိုင်းနှင့် ဗဟုသုတများ တိုးပွားဖို့ ဆောင်ရွက်ပေးရန် လိုကြောင်း သိရသည်။
Eleven Media Group
No comments:
Post a Comment