"ဒီတော့ အနီးစပ်ဆုံး ကြည့်လိုက်တဲ့အခါမှာ အလွယ်လန်းလိုက်ပြီး အပျော်လည်းမက်ရ၊ နာမည်လည်း ကြီးလို့ ရတဲ့ အကောင်းဆုံး လျှောက် လမ်း တစ်ခုက အနုပညာ လမ်းကြောင်း ဖြစ်နေပါတယ်။"
ခုနေ စာဖတ်သူတို့ရဲ့ ပတ်ဝန်းကျင်မှာ မိတ်ဆွေ ၇ ယောက်ရှိရင် အနည်းဆုံး ၁ ယောက်လောက်က အနုပညာနဲ့ ဆက်စပ်တဲ့ အလုပ်လုပ်နေပါတယ်။ မိန်းကလေးပဲ ဖြစ်ဖြစ်၊ ယောင်္ကျားလေးပဲ ဖြစ်ဖြစ် အနုပညာနဲ့ တစ်နည်းမဟုတ် တစ်နည်းဆက်စပ်ပြီး မော်ဒယ်လိုလုပ်၊ သရုပ်ဆောင်လို လို၊ အဆိုတော်လိုလို၊ ဂီတ သမားလိုလို၊ ဓာတ်ပုံ သမား လိုလို အရမ်းများပါတယ်။ အဲ့လို များလို့ အပြစ်ပြောတာ မဟုတ်ပါဘူးနော်။ ဒါတွေ ဟာလည်း တိုင်းပြည်မှာ လိုအပ်နေတဲ့ အရာတွေပါပဲ။
အမေရိကန်မှာ ဟောလိဝုဒ်ကို မြို့သီးသန့်ခွဲလိုက် အကြောင်းအရင်း ရှိပါတယ်။ ဒါကတော့ အနုပညာ အသိုင်းအဝိုင်းရဲ့ ယဉ်ကျေးမှုအလေ့အထနဲ့ သာမန်လူ အသိုင်းအဝိုင်းက ယဉ်ကျေးမှု အလေ့အထိ ဆီးကူးသွားမှာ စိုးလို့ ဖြစ်ပါတယ်။ ဟောလိဝုဒ်က အနုပညာသယ်တွေ သူတို့မြို့ထဲ မှာ ဖြစ်သလိုနေ၊ ဖြစ်သလို သွားလို့ ဂရုစိုက်မယ့်သူ မရှိပါဘူး။ သို့ပေမယ့် အခြားမြို့တစ်ခုခုကို ထွက်လိုက်ရင် အနည်းနဲ့ အများ လူ ဂရုစိုက်ခံရပြီး မီဒီယာ ကင်မရာ လက်ချက်ကနေလည်း မလွတ်ပါ။ ဒါကြောင့်ပဲ ဥာဏ်ပညာအမြော်အမြင်ကြီးတဲ့ အမေရိကန် အစိုးရ များက အနုပညာ လုပ်ငန်းများကို သီးသန့်လုပ်ကိုင်ပြီး တိုင်းပြည်အတွက် အထောက် အကူ ပြုဖို့ မြို့တစ်ခုအဖြစ် သတ်မှတ်ပေးခဲ့ခြင်း ဖြစ်ပါတယ်။
အိုင်တီလုပ်ငန်းနဲ့ ပက်သက်ရင် ဆီလီကွန် တောင်ကြားမှာ စုဝေးစေ သလို၊ လောင်းကစား လုပ်ငန်းအတွက် လက်စ်ဗီးကပ်မှာ စုဝေးစေပါတယ်။ စတော့ရှယ်ယာ အတွက် Wall Street မှာ စုဝေးစေပြီး နိုင်ငံ အစိုးရ ရုံး စိုက်ဖို့အတွက် ဝါရှင်တန်ကို ရွေးချယ်ပါတယ်။ အာကာသနဲ့ သဘာဝ သုတေသန လုပ်ငန်းအတွက် အရီဇိုးနား မှာ ရုံးစိုက်စေပါတယ်။ စိုက်ပျိုးရေးအတွက် တက္ကဆက်နဲ့ ဗာဂျီနီးယား၊ မော်တော်ယာဉ် စက်မှု လုပ်ငန်း အတွက် မစ်ချီးဂန်း အစရှိသဖြင့် ကွဲပါတယ်။
ဒီလိုခွဲတယ်ဆိုတာ ခွဲချင်တိုင်း ခွဲတာ မဟုတ်ပါဘူး။ ကဏ္ဍတွေ ရောစပ် ပူးကပ်သွားမှာစိုးလို့ ဖြစ်ပါတယ်။ အနုပညာ လုပ်ချင်သူများအတွက် တစ်နေရာ၊ စီးပွားရေးအတွက် တစ်နေရာ၊ စိုက်ပျိုးရေးအတွက် တစ်နေရာ၊ အိုင်တီ အတွက် တစ်နေရာ အစရှိသဖြင့် သေချာ ခွဲထားပါတယ်။
လက်ရှိ ရန်ကုန်မြို့ကြီးကတော့ အားလုံး ပေါင်းစုံပါတယ်။ အိုင်တီလုပ်ငန်း များ စုဝေးပါတယ်။ အနုပညာလုပ်ငန်းများ စုဝေးပါတယ်။ ပျော်စရာ စုဝေးပါတယ်။ စီးပွားရေး လုပ်ငန်း စုဝေးပါတယ်။ အစိုးရုံးပိုင်းဆိုင်ရာ လုပ်ငန်းတွေကိုတော့ နေပြည်တော်ကို ပြောင်းလိုက်ပါပြီ။ ကျန်တာ အများစုကတော့ ရန်ကုန်ဟာပဲ အဓိက အချက်ချာ ကျတဲ့ နေရာ တစ်ခု ဖြစ်နေဆဲ ဖြစ်ပါတယ်။
ဒီတော့ ရန်ကုန်မှာ နေထိုင်၊ ကြီးပြင်းလာတဲ့ ကလေးများ၊ လူငယ်များဟာ သူတို့ ပတ်ဝန်းကျင်မှာ လူတန်းစား ပေါင်းစုံ၊ လူမျိုးပေါင်းစုံ၊ လုပ်ငန်းပေါင်း စုံကို မြင်တွေ့ရပါတယ်။ မြင်တွေ့ရမှုအထဲမှာ သူတို့ ဥာဏ်အမှီလွယ်ဆုံး၊ အလွယ်တကူ အသွားနိုင်ဆုံးက အနုပညာလုပ်ငန်း ဖြစ်လို့နေပါတယ်။ သီချင်းဆိုပြိုင်ပွဲ၊ မော်ဒယ်ပြိုင်ပွဲ၊ ဓာတ်ပုံ ပြိုင်ပွဲ၊ သရုပ်ဆောင် ပြိုင်ပွဲ အစရှိသဖြင့် စာရွက်စာတမ်း ပညာရေး အထောက်အကူ ပြုစရာ သိပ်မ်လိုတဲ့ လမ်းကို လွယ်တကူ ရွေးတတ်ကြ ပါတယ်။ ဝင်ရတာ လွယ်ကူတာကြောင့်တင် မကပဲ လူတကာ ဂရုစိုက်ခံချင်စိတ်၊ လူတကာ အထင်ကြီးလေးစား၊ အချစ်ခံချင်စိတ်က ပိုပြီးတော့ ကြီးထွားလာပါတယ်။
နဂိုကတည်းက ပညာရေး စနစ် လိုအပ်ချက်ရှိနေသေးတဲ့ မြန်မာပြည်မှာ အထင်ကြီးခံချင်ကြ၊ အလေးစားခံချင်ကြ၊ ဂရုစိုက်ခံချင်ကြ တဲ့ လူငယ်တွေက အနုပညာ လုပ်ငန်းကို လွယ်တကူ ရွေးချယ်လိုက်ကြ ပါတယ်။ ဒီလိုရွေးလို့ အပြစ်မဆိုလိုပါဘူး။ ရွေးချယ်မှုထဲမှာ အမှန်တကယ် ထိုးဖောက် အောင်မြင်သွားသူ များလည်း လက်ချိုးရေမရအောင် အတော်လေးများပါတယ်။ ဒီ အနုပညာအလုပ်က လွယ်လည်း မလွယ်ပါဘူး။ ဝင်ရတာ လွယ်ပေမယ့် ရပ်တည်ဖို့ လွယ်ပေမယ့် အောင်မြင်ဖို့ ခက်ခဲတဲ့ လမ်း ဖြစ်ပါတယ်။
ဒါနဲ့ပဲ အောင်မြင်ဖုိ့အတွက် တစ်နည်းမဟုတ် တစ်နည်းကြိုးပမ်းကြ၊ ရုန်းကန်ကြ၊ ကြိုးစားကြရင်းနဲ့ အသက်တွေ ကြီးလာပြီး တိုင်းပြည်ရဲ့ လူ့စွမ်းအား အရင်းအမြစ်ဟာ အတော်လေး ကျဆင်းသွားရ ပါတယ်။
"ဒီတော့ မိမိ အကြားအမြင် ဗဟုသုတနဲ့ ပက်သက်ပြီးတော့ များစွာ လေ့လာသင်ယူဖို့ လိုသလို၊ ပေါ်ပင် နာမည်ကြီးချင်စိတ်၊ အထင်ကြီးခံချင်စိတ်၊ အောင်မြင်စိတ်တွေကိုလည်း သေချာသုံးသပ်ရပါမယ်။ ဒါတွေကို ဖျက်ရမယ်။ ဖျောက်ရမယ်လို့ ပြောတာ မဟုတ်ပါဘူး။ အဲ့ဒီအရာတွေ ရရှိဖို့အတွက် အနုပညာနဲ့ မဟုတ်ပဲ အခြား ဘယ်နည်းလမ်းနဲ့ ငါကြိုးစားနိုင်သေးသလဲ ဆိုတာကို သုံးသပ်စေဖုိ့ ဖြစ်ပါတယ်။"
တိုင်းပြည်တစ်ပြည် ဖွံ့ဖြိုးတိုးတက်ဖို့၊ နိုင်ငံတကာနဲ့ ရင်ဘောင်တန်းဖို့ဆိုတာ ဘက်ပေါင်းစုံ၊ ကဏ္ဍပေါင်းစုံက ဖွံ့ဖြိုးဖို့လိုအပ် ပါတယ်။ ဒီတော့ ဘက်ပေါင်းစုံ၊ ကဏ္ဍပေါင်းစုံမှာ ထူးချွန်ထက်မြတ်တဲ့ လူ့စွမ်းအား အရင်းအမြစ် များ ရှိဖို့ လိုအပ် ပါတယ်။ အိမ်တစ်အိမ်ကို သံချောင်းတွေချည်းနဲ့ ဆောက်လို့မရသလို၊ အုတ်ချည်းသက်သက်နဲ့ လည်း ဆောက်လုိ့ မရပါဘူး။ အုတ်နဲ့ သံချောင်း အချိုးကျပြီး အခြား လိုအပ်တဲ့ အဆာပလာ စုံလင်ပါမှ အိမ်ကောင်းကောင်း တစ်လုံး ထွက်လာစေတာ ဖြစ်ပါတယ်။ အလားတူပါပဲ တိုင်းပြည်တစ်ပြည် ဖွံ့ဖြိုး တိုးတက်ဖို့ အတွက် ကဏ္ဍပေါင်းစုံက လူငယ်များ အချိုးကျ ပါဝင်ဖို့ လိုတယ်ဆိုတာကို တိုက်တွန်းအကြံပြုရင်း စေတနာထား ရေးသား လိုက်ရ ပါတယ်။
အောင်ခမ်း (ရိုးရာလေး)
.
No comments:
Post a Comment