မြန်မာတွေတော်တော်များများ တန်းမစီတတ်ကြတော့ဘူးလို့ ကျွန်တော်ပြောရင် ကျွန်တော့်ကို အလွန်ကြီးပဲလို့ ပြန်ပြောမယ့်သူတွေအများကြီးရှိလိမ့်မယ်။ ကျွန်တော်ဥပမာတစ်ခုပြပါ့မယ်။ အချိန်ကရုံးဆင်းတဲ့အချိန် ညနေ ၆နာရီလောက်။ လမ်းမတစ်ခုလုံးကားတွေနဲ့ ပြည့်ကျပ်နေပြီး မီးပွိုင့်စောင့်နေတဲ့ ကားတန်းကြီးက မျက်စိတစ်ဆုံး။ ဒီအချိန်မှာ ဘတ်စ်ကားတစ်စီးဟာ မီးပွိုင့်တန်းစီနေတဲ့ကားတွေအကုန်လုံးကို ဘယ်ဘက်ယာဉ်ကြောကနေ လမ်းပြောင်းပြန်မောင်းပြီး ကျော်ဖြတ်လာရာက တန်းစီနေတဲ့ကားတန်းထဲကို ခေါင်းထိုးဝင်ရောက်ဖို့ကြိုးစားတယ်။ အဲဒီကားနောက်မှာ နောက်ထပ် တစ်စီးပြီးတစ်စီးဆက်တိုက်လိုက်လာတယ်။ သိပ်မကြာခင်မီးပွိုင့်လွှတ်တဲ့အချိန် တစ်ဖက်ယာဉ်ကြောကားတွေဟာ လမ်းကြောပြောင်းပြန်စီထားတဲ့ ကားတွေကြောင့် ဆက်သွားလို့မရတော့ဘဲ ရပ်တန့်သွားတယ်။ အဲဒီမှာပဲ နှစ်ဘက်စလုံးက ကားတန်းတွေဟာ ရှေ့လည်းမတိုးနိုင် နောက်လည်းမဆုတ်နိုင်ဖြစ်ကုန်ပြီး သိပ်မကြာခင် လမ်းမတစ်လျှောက်လုံးပိတ်ဆို့၊ ဟွန်းသံတွေဆူညံပြီး အရပ်ပျက်နေသလိုဖြစ်သွားတယ်။
ဒီလိုအဖြစ်အပျက်မျိုးဟာ အပြင်ထွက်နေရတဲ့သူတိုင်း နေ့တိုင်းလိုလိုကြုံတွေ့ရတတ်တဲ့ပြဿနာပါ။ ဒီတစ်နေရာတည်းလားဆိုတော့ ကားတန်းစီတဲ့ကိစ္စဟာ သာဓကပေါင်းများစွာထဲက သာဓကတစ်ခုပါ။ တက္ကသိုလ်တွေမှာ ကျောင်းလခသွင်းဖို့လိုမျိုး၊ ကျောင်းတက်ဖို့ဖောင်ဖြည့်တာလိုမျိုးတွေမှာ တန်းမစီကြဘဲ အချင်းချင်းအလုအယက်တိုးဝှေ့ကြလို့ ထိခိုက်ဒဏ်ရာတွေရကြတယ်၊ ဘတ်စ်ကားစီးတဲ့နေရာ၊ ရထားစီးတဲ့နေရာအစချီပြီး ပြောရင်ကုန်မှာတောင်မဟုတ်တဲ့ နေရာပေါင်းများစွာမှာ စနစ်တကျတန်းစီနေကြတယ်ဆိုတာကို အတော်လေးအတွေ့ရခက်လာပြီး နေရာတိုင်းလိုလိုမှာ အလုအယက်တိုးဝှေ့နေကြတဲ့ ၀ရုန်းသုန်းကား လူအုပ်စုကြီးတွေကိုသာ မြင်ရလိမ့်မယ်။
ဘာလို့ ကျွန်တော်တို့နိုင်ငံမှာ တန်းစီတဲ့အလေ့အထမထွန်းကားရတာလဲ။ အရှင်းဆုံးအဖြေကတော့ မရှက်သင့်တဲ့အရာတွေကိုရှက်ပြီး ရှက်သင့်တဲ့အရာတွေကို မရှက်ကြတော့လို့ပါ။ တကယ်တော့တန်းစီတယ်ဆိုတာ ယဉ်ကျေးတဲ့လူတွေ၊ စိတ်ဓာတ်ဖွံ့ဖြိုးရင့်ကျက်တဲ့လူတွေရဲ့ စရိုက်လက္ခဏာ၊ တစ်နည်းအားဖြင့် နိုင်ငံကြီးသားတွေရဲ့ လက္ခဏာပါ။ အပြန်အလှန်အားဖြင့်တော့ တန်းမစီကြတဲ့သူတွေဟာ မယဉ်ကျေးသေးတဲ့ ကျောက်ခတ်ကလိုပရမ်းပတာစရိုက်၊ စိတ်ဓာတ်သေးသိမ်တဲ့လူတွေရဲ့ စရိုက်လို့ဆိုရမယ်ထင်တယ်။ တချို့လူတွေက တန်းစီရမှာကို ရှက်စရာလို့ထင်ကြတယ်။ တန်းစီနေတဲ့အတန်းကြီးထဲမှာ မျက်နှာပြောင်ပြောင်နဲ့ ကြားဖြတ်ပြီးဝင်ချင်ကြတယ်၊ အဲလိုကြားဖြတ်ဝင်ပြီး နေရာရလိုက်တာကို “ငါကွ” ဆိုတဲ့ပုံစံမျိုးနဲ့ ဂုဏ်ယူဝင့်ကြွားချင်ကြတယ်။ တစ်ချို့ကျတော့လည်း “တွေ့လား ငါက တန်းစီစရာမလိုဘူးကွ” ဆိုတာမျိုးပြချင်တယ်။ နိုင်ငံအချို့မှာ ခေါင်းဆောင်တွေ၊ အကြီးအကဲတွေကိုယ်တိုင် တန်းစီနေကြပေမယ့် ဒီမှာတော့ အခွင့်အရေးရရင် ရသလောက်နဲ့ ကြားဖြတ်နေရာယူကြတာက အလေ့အထတစ်ခုလိုဖြစ်လာတယ်။ သူတို့အတွက် ဒါဟာရှက်စရာတစ်ခုအဖြစ် သေးသိမ်တဲ့လုပ်ရပ်တစ်ခုအဖြစ် မမြင်တတ်ကြတာဖြစ်နိုင်သလို သိမ်ဖျင်းတဲ့စိတ်ဓါတ်အခံကြောင့် လူမှုနီတိဆိုတာကို နားလည်နိုင်စွမ်းမရှိတော့ဘဲ အမှားလား၊ အမှန်လားဆိုတာကို ခွဲခြားမသိနိုင်တာကြောင့်လည်း ဖြစ်နိုင်ပါတယ်။
ဂျပန်မှာ ဖူကူရှီးမားငလျင်လှုပ်ပြီး လူတွေအတိဒုက္ခရောက်ကျတော့ စတိုးဆိုင်တွေက ရှိသမျှတွေကို ထုတ်ရောင်းပေးတယ်။ မတရားဈေးတင်ရောင်းတာမျိုးမရှိဘူး။ ဈေးဝယ်သူတွေဘက်ကလည်း လုယက်တာတွေ၊ ၀ရုန်းသုန်းကား တိုးဝှေ့တိုက်ခိုက်ကြတာတွေမရှိဘူး။ အားလုံး အေးအေးဆေးဆေးတန်းစီရင်း အရင်ဝယ်ခွင့်ရတဲ့သူက နောက်လူအတွက် ချန်ဝယ်ပေးတယ်။ ကိုယ်အရင်ဝယ်ခွင့်ရလို့လည်း တစ်ယောက်တည်းသိမ်းကျုံးဝယ်တာမျိုးတွေမလုပ်ဘူး။ ဂျပန်လိုဖွံ့ဖြိုးတဲ့နိုင်ငံအတော်များများမှာ အလုအယက်တိုးဝှေ့နေတာမျိုးဆိုတာက မတွေ့ရသလောက်ပဲ။ ကော်ဖီဝယ်တာ မုန့်ဝယ်တာမျိုး အသေးအဖွဲလေးတွေကအစ ရှေ့မှာလူတစ်ယောက်ရှိတယ်ဆိုရင် အဲဒီလူတစ်ယောက်အနောက်မှာ အေးအေးဆေးဆေးရပ်စောင့်နေတတ်တယ်။ ယုတ်စွအဆုံးလူကူးမျဉ်းကျားကူးဖို့တောင် တန်းစီကြတယ်။ ဒီအချက်က နိုင်ငံတစ်နိုင်ငံရဲ့ ဖွံ့ဖြိုးတိုးတက်မှုအတွက် ရုပ်ပိုင်းဆိုင်ရာတင်မကဘဲ နိုင်ငံသားတွေရဲ့ စိတ်ပိုင်းဆိုင်ရာ ရင့်ကျက်ဖွံ့ဖြိုးမှုကလည်း အရေးပါနေတယ်ဆိုတဲ့အချက်ကို ပြတာပါ။ သူတို့တွေဘာ့ကြောင့်တန်းစီကြတာလဲ။ မဖြစ်မနေတန်းစီရမယ်လို့ ဥပဒေအရ သတ်မှတ်ထားတာမျိုးလည်းမရှိပါဘူး။ အဓိကကတော့ ရှက်စိတ်ပါ။ တန်းမစီဘဲ ကြားဖြတ်ဝင်ရတာ၊ စုပြုံတိုးရတာ ရှက်စရာကောင်းတယ်လို့ ခံယူထားတဲ့စိတ်ကြောင့်ပါ။ အဲဒီရှက်စိတ်လေး ကျွန်တော်တို့ဆီမှာ မပေါ်လာသေးသရွေ့ စုပြုံတိုးဝှေ့တာတွေရှိနေဦးမှာပဲ။ ဥပမာကလေးငယ်တစ်ယောက်က ဘောင်းဘီမပါဘဲ လျှောက်သွားနေတာကို ရှက်စရာအဖြစ် မသိသေးသရွေ့ ဘောင်းဘီဝတ်ဝတ်မ၀တ်ဝတ် သူ့အတွက် အရေးမကြီးသလိုပါပဲ။ ရှက်စရာလို့မြင်လာတာနဲ့ အလိုလိုပြုပြင်ပြီးဖြစ်သွားမှာပါ။
တန်းမစီတတ်တဲ့သူတွေဆီမှာ အများဆုံးတွေ့ရတတ်တဲ့စိတ်တစ်မျိုးကတော့ တကိုယ်ကောင်းဆန်တဲ့စိတ်ပါ။ အဲဒီလိုလူမျိုးတွေမှာ “ငါနှင့်ငါသာ နှိုင်းစရာ” ဆိုတဲ့သဘောမျိုးနဲ့ ငါ့ကိစ္စက အရေးအကြီးဆုံး၊ ငါကအရေးအပါဆုံးဆိုတာမျိုးတွေစွဲနေတတ်တယ်။ နောက်လူအတွက် မကြည့်တတ်ဘူး၊ နောက်လူဘယ်လိုဆိုတာမျိုးမစဉ်းစားဘူး။ တကယ်တော့ တန်းမစီတတ်တာ ဂုဏ်ယူစရာမဟုတ်ဘူး။ တန်းမစီတတ်တာ ရှက်စရာပါ။ တန်းမစီတတ်လို့ ၀ရုန်းသုန်းကားနဲ့ လုပ်ကြတာ လူပင်ပန်း၊ အလုပ်မဖြစ်သလို နိုင်ငံခြားသားတွေအမြင်မှာလည်းအထင်သေးစရာကောင်းပါတယ်။ နေရာတကာ ၀ရုန်းသုန်းကားနဲ့ စုပြုံတိုးဝှေ့အရပ်ပျက်သလိုဖြစ်နေလို့ မြန်မာတွေဟာ မယဉ်ကျေးသေးတဲ့လူမျိုးလို့သာ ထင်သွားရင်တော့ နဂိုဆင်းရဲရတဲ့ကြားထဲ နောက်ထပ်နာမည်ပျက်ရပါမယ်။ ဒီကိစ္စကိုအသေးအဖွဲလေးလို့ ထင်ရင်လည်းထင်ပါလိမ့်မယ်။ ဒါပေမယ့် အသေးအဖွဲလေးတွေကစပြီး မပြုပြင်နိုင်ရင် အကြီးအမားတွေလည်း ပြုပြင်နိုင်မှာမဟုတ်ဘူး။ မပြုပြင်ခဲ့မိလို့ အချိန်ကြာလာတာနဲ့အမျှ အမှားတွေအမှန်ဖြစ်လာခဲ့ရင်၊ တန်းစီရတာရှက်စရာ စုပြုံတိုးဝှေ့တာကမှ အမှန်ဆိုတာမျိုးတွေဖြစ်လာရင် ပြုပြင်ဖို့ခက်သွားတော့မှာပါ။
No comments:
Post a Comment