ဆန္ဒပြသူ ၁,၀၀၀ လောက်ဟာ တနင်္လာနေ့မှာ ဘဏ္ဍာရေးဝန်ကြီးရုံး အဆောက်အဦးတွေထဲ ဝင်ရောက် နေရာယူထားကြတာပါ။ တချို့က နိုင်ငံခြားရေးဝန်ကြီးရုံးဝင်းထဲ ဝင်ရောက်ဖို့ ကြိုးစားနေကြပေမယ့် ရုံးအဆောက်အဦးတွေထဲတော့ မဝင်နိုင်ကြသေးပါဘူး။ ဆန္ဒပြသူတွေကို ဖယ်ရှားတားဆီးဖို့ မကြိုးစားတဲ့ ရဲတွေကတော့ ဘန်ကောက်မြို့တော်တလွှားက အစိုးရအဆောက်အဦး အနည်းဆုံး ၁၃ ခုဆီကို ဆန္ဒပြသူ သုံးသောင်းလောက် ချီတက်နေကြတယ်လို့ ပြောပါတယ်။
ဆန္ဒပြသူတွေကို အတိုက်အခံပါတီက အဓိကဦးဆောင်နေတာဖြစ်ပြီး သူတို့က ဝန်ကြီးချုပ်ယင်းလပ်ရှင်နာဝပ် နှုတ်ထွက်ပေးဖို့ တောင်းဆိုနေကြသလို သူ့ကို သူရဲ့အကိုတော်သူ ပြည်ပမှာခိုလှုံနေတဲ့ ဝန်ကြီးချုပ်ဟောင်း Thaksin Shinawatra က နောက်ကွယ်က ကြိုးကိုင်ပြီး ထိုင်းနိုင်ငံရေးကို နောက်ကွယ် ကနေ ခြယ်လှယ်နေတယ်လို့ ဆန္ဒပြသူတွေက စွပ်စွဲကြပါတယ်။
တချိန်တည်းမှာပဲ လက်ရှိအစိုးရကိုထောက်ခံတဲ့ ရှပ်နီဝတ်တွေကလည်း ဘန်ကောက်က အားကစားရုံထဲမှာ နေရာယူ စုဝေးဆန္ဒပြနေကြပါတယ်။ အတိုက်အခံတွေဘက်က ဆန္ဒပြမှုတွေ မရပ်မချင်း သူတို့ကလည်း အားကစားရုံကနေ ဖယ်မပေးဘူးလို့ ဆိုပါတယ်။
ဒါဟာ ၂၀၁၀ က လူတွေ သေကြေတဲ့အထိဖြစ်ခဲ့ရတဲ့ ဘန်ကောက်မြို့လမ်းမတွေ ပေါ်က ဆန္ဒပြပွဲတွေ နောက်ပိုင်းဖြစ်ပွားတဲ့ အကြီးဆုံးလူထုဆန္ဒပြပွဲဖြစ်ပြီး လက်ရှိအစိုးရကို ထောက်ခံသူတွေနဲ့ ဆန့်ကျင်သူတွေ ကြား ဖြစ်ပွားတဲ့ အဓိကရုဏ်းတွေကနေ သွေးထွက်သံယိုဖြစ်ပွားလာမှာကို ထိုင်းနိုင်ငံသားတွေ စိုးရိမ်နေကြပါတယ်။
ဗွီအိုအေ (မြန်မာဌာန)
No comments:
Post a Comment